Ka Pu, Mangtha aw!

October ni 24 zinglam dar 3 pelh hretah chuan kan inah phone a lo ri a, kan lo rinlawk ni si, mahse a tak ni tura kan beisei phal si loh thuthar chu a lo thleng ta ngeiah ka ngai a, kan rinlawk ang chiah chuan thihna thu chu kan hre ta a, a hma atang tawh a hreh taka kan lo nghah ruk tho si a ni a, hemi zan hian a dinhmun a chhe tawh hle tih kan hriat avangin kan chhungkua tu a mah kan mu tha lo hle hrim hrim a. Kan chhung zinga thenkhat te chu a damlai hmel hmuh duhin, a hma ni lawkah te pawh an lo zut kal tawh a. Keini pawh hemi zing hian hmanhmawh takin Kolasib lam panin kan chhuak a.

Hun rei tak chhung chakvak lo taka a awm hnu leh kar khat vel chhung khumbeta a awm hnu in Ka Pu (Pu Sapmawia) chuan kum 88 mi niin October ni 24, zinglam dar 3 khan nat leh hreawm awm tawh lohna, a chatuan ram min pan san ta a. Vawi tamtak liam mai turin awm tawh mahse zawi zawiin a lo tha chhuak leh thin a, mahse tunah erawh chuan tihngaihna a awm ta lo, a thlakhlelh ngawih ngawih leh amah thlahlel ngawih ngawihtute nen an inthen a tul ta si. Pathian in na leh hreawm a tawrh reng phal lovin a hnenah a hruai ta a ni.

Ka Pu kha ka Pa lama ka pu (Paternal grandfather) u chiah a ni a, Ka pa pa hi kum 49 mi chauh niin ka pa te unau puitlin hma leh ka Ni Apuii pawh nausen a nih laiin Cancer natna in a boral a. Tuna ka pu min kalsan tu hi ka Pa lama kan Pu neihchhun tak meuh meuh a ni a, Pa leh Pu tak tak anga kan en leh min hmangaih em em tu a ni a, fate leh tute kilkawi leh kawmhlim thiam tak a ni a, a tu leh fate hi min ngaihven thei em em a, khaw khatah awm lo mah ila kan chanchin hre lo hian a awm ngai lo. Pa huaisen, pa zaidam leh tuarchhel tak a ni bawk. Nghilhni kan nei tawh lo ang. Kolasib Vengthara an Inah vuiliam a ni a, amah hi Kolasib Pa hlun tak mai a ni a, a vuina ah pawh mi an thahnem hle a ni.