Jesus take the Wheel

Carrie Underwood in a sak, hla lar tak 'Jesus take the Wheel' tih chu ka ngaithla a. A hla thupui 'Jesus take the Wheel' tih hi ka duhin ka rilru ah a cham reng a. Thu tawite mah nise, thil tam tak a sawi niin ka hria, ka nunah hian ka dam chhung zawnga a taka hman ka chak a ka duh bawk. Mahse mihring nih chhung chuan mahni in ke kan pen a, kan tana tha leh tha lo tur pawh hrethiam lovin kan duh duhin kan kal thin a, a tawpah chuan keimahni min ti hreawm tu mai a lo ni thin.

Ka nun kaltawhte ka thlir kirin, pawi lian tak khawih emaw ka dam chhung zawnga ka inthiamlohna tur khawp pawi khawih lo mah ila, khawi emaw lai atanga bul tan that chakna te ka nei thin. Kawng hrang hrangah harsatna hrang hrangte'n min tlakbuak ve tho, rilru hahna tam takte ka lo nei ve a, naupan lai ang ngawt khan thil a awm tawh lo. Hengte hi mahni ngawt chuan tuar a hreawm a. Mihringin min hnem thei lo. Lungngaihna leh beidawnna te hian kian ni nei thin mah se, rawn inlar ni a nei leh tho bawk si.

Ka nun hi Pathian kutah dahin a venhimna leh kaihhruaina dilin dawng thin mah ila, khawvela awm chhung chuan mahni duhna lama ke lo pen ve ngawt chang te, rin loh leh beisei loh lam atanga harsatna leh manganna lo thlen chang a awm thin, khawvel a ni miau a. Mahni nun hi mahni'n a khalh loh a, Pathian hi a hring a hran hian ka bulah hian lo awm se, ka nun hi a kutah dah tawp a, awm tawp mai hi ka chak thin. Pathian kutah ka dah ti mah ila, khawvel a awm chhung chuan mahni ke a pen a, pen sual chang a awm lo thei bawk si lo. A lehlama ka ngaihtuah chuan Pathian hian kan tawrh hi a phal ve miau bawk si. Engpawh nise, 'Jesus take the wheel' tih hi chuan ka nunah thil tam tak a sawi a, he thu tawite hi ka duh hle a ni.