Mihring te hian mahni tawkah harsatna leh manganna kan tuar theuh a, mahse kan Bible chuan engkim hi Pathian remruat niin min zirtir a, a chang hi chuan rinhlelh te hi a awl thin. Hreawm tih luatah Pathian pawi te pawh kan sawi lek lek thin a, mahse Pathian chuan kan tawrh a phal a. Kan tawrh laiin hreawm tiin rilru na hle mah ila Pathian in kan thatna tura a remruat a ni tih kan rinna chiah hi kan inhnemna awmchhun a ni thin.
Ka nun ah hian hreawm leh rilru hahna tam tak ka lo tawk tawh a, a chang chuan sap in 'depression' an tih ang hi ka nei ve ni te hian ka hria a. Keima thil tih dikloh ni si lo ah te nasa takin ka tuar a, hreawm ka ti a. Thil hi a eng zawnga thlir ka tum hram hram a. Beidawnna ten min hliam fo thin. Nun hian awmzia a neilo a hriatna ka nei fo a. Thenkhatin 'Life is Good' an ti a, hei hi ka ngaihtuah a, an nun in a zir vang hrim hrim nge harsatna an tawh ve ngai loh vang nge a tawrh dan an thiam vang zawk ti te in ka inzawt fo bawk thin. Thil tihsual em em leh mualphona chhan tur nei lo mah ila khawi emaw laia nun bul tan that chakna te ka nei thin a.
Hlim taka ka awm hnu lawkah lungngaihna in a rawn zui vat a, beiseina duhawm tak ka neih hnu lawkah beidawnna in a rawn zui leh vat a. Harsatna leh manganna ka tawh reng rengin ka sawi chhuak ngai lo keimahin ka tuar mai thin hian mahni ah thaw ipikna a siam zualin ka hria a, mahse tihdan zawng hi a awm ve bawk si a. Thil sawichhuah hrim hrim hreh mi ka nih bakah ka tawng tam lova, ka nel awm loh bakah, miin min nel lova, thian siam leh thian kawm te hi ka thil thiamloh ber te zinga mi a ni.
Ka sawi tawh zawng zawngah khian 'Mahse' kan ti teh ang, heng harsatna zawng zawng ka tawh chang hian Pathian hi a awm lo ang tih ka hlau thin. He khawvelah innghahna tur dang ka nei lo, thil tihtheihna emaw sum lamah engmah chhuan tur ka nei lo, mahse Pathian chiah hi ka innghahna a ni a, ka ring ber bawk. Tunah hian ka rinchhan leh innghahna Pathian hi awm ta lo se, ka nun hian awmzia a neih ka ring lo, ka tawrh a phal a min tawrh tir a, amah ka hnaih theih nan. Harsatna tawh loh chuan amah koh nachang ka hre lo fo a, chuvangin ka tawrhna zawng zawng amah ka hnaih theih nana a remruat tih hi ka ring tlat bawk a ni
