Ka hmangaih thu che leh kan tana i thawhrimna avanga lawmthu vawikhatmah ka hrilh lo che kha chu pawi ka ti a, ngaihdam ka ngaihna lai zawng zawng a ngaihdam ka dil lo che kha hreawm ka ti hle mai. Pa, i chungah hian engkimah kan lawm a, ngaihdam kan ngaihna laiah khan min ngaidam ang che aw. Khati leh chen kan tan nasa takin i thawk a, nuamsa tak pawhin kan siam ve hman si lo che a, rilru hi a va han na tak em.
Pa, heti maia min kalsan hi engtiklai mahin ka ring ngai lo, Damdawiin ah pawh ka rawn kan ve theih hma che in min lo kalsan a, na ka ti hle mai. I thih thu min rawn hrilh pawh khan ka la awi chuang lo, mahse nunna nei tawh lo i taksa ka hmuh khan awi lo thei lo dinhmunah ka ding tih ka hre ve chauh.
Pa, ka fapa, i tu hmuh hmasak ber a pian ni a i lawmzia te kha an sawi an sawi asin, chhungte i hrilh kual a, a lawm nan chaw kan eikhawm ang te i ti a ni si a. Ka fapa pian tlaia i chetsualna a i hliam kha i liampui ta mai chu a ni si a, ka tan chuan theihnghilh a va han har dawn em. Malsawmkima Khiangte tiin i tupa hming i sa hman a, a hmel vawikhat i hmu hman hram chauh a ni si a, tunah hian thla khat a tling ve dawn tawh a, han hmu ve la chuan i lawm ve ngawt ang. Ka fapa hian nangmah avang hian ka mittui a ko chhuak fo asin. La dam ni la ka fapa i duat dan tur ka suangtuah ringawt pawh hian min kalsan hi a hun ka ti thei lo.
Hmuh tur leh i aw hriat tur a awm ta lo mai hi ngaiah a neih theih dawn em ni? Hriatthiam hi a va han harsa tak em! Min han liamsan mai tur atan chuan i kum te pawh hi a la tlem lutuk, mi pa te pawh an tar thlengin an dam asin. Pa, rawn leng thla ila chaw ei lova min hawtir i phal ngai lova, ka nu hnenah ka chawhmeh duhzawng siam tur ten i ti thin kha a ni a, tunah chuan rawn lengthla pawh ni ila, hmuh tur i awm tawh si lo, a khawharthlak lutuk.
Pa, ka chhuang che a, ka ngai che a, Pa ti a koh tur awm tawh lo mah la, Pa nei lo chu ka inti phal ngai lovang. Hun hian nang ngaih hi min hnem mahna, mahse ka thinlung atang hi chuan i engtikahmah i hla ngai lovang.
http://www.youtube.com/watch?v=29nas-N34Ec
6 comments:
Ka tawrhpui khawp mai che. I Pa chuan thlamuang takin chawl hahdam sela, lei piah lam ramah hlim leh lawm takin, chhungkaw kim takin in la intawng leh ngei ang tih ka ring tlat a ni.
Thil hi tur reng a ngaih hi kan ching lutuk a, a saptawng takin granted a lak hi kan ching hi sim a tha. :-) I pa ai in ni khat in ka naupang, 7th June-ah ka piang :-P
Very very touching, Nancy. God bless you my dear, and may you continue having the strength to carry on. He will indeed be always in your heart, never apart from you.
Ami deh avan na vele... sad
We shall meet by and by.. Pa ti a koh tur he lei ah hian nei tawh loh hi khawvel a thil hreawm ber ani.
Ava tha em em ve...hei lo pawh hi sawi tur ila ngah in ka ring. Ka hriatthiampui khawp mai che. I pa leh ka pa an inrual deuh reng a nih hi male....ka pa chu 1993 khan a boral thung a.
Post a Comment