Ziak ve lok teh ang.. sawrkar thar

Inthlan a zo a, vote chhiar a ni a, Sawrkar thar chu kan nei ta. A result-ah hian ring sual tak tak an tam ka ring. Keipawhin a mala sawrkar theih an awm ka lo ring lo a, chutihrualin sawrkarna siam tura awh pawh ka nei lem chuang lo. Tling se tih ka neih loh laiin tla se tih chu ka nei thung. Hnathawhna in a zir bawk a, Politics a tui ngai reng reng lo pawhin, ka tui thar ta tihna nilovin, ngaihven a awl ta khawp mai. A loh theih loh a ni ber ang chu, thil ril tak tak thlengin hriat a mual mual te ka lo nei ve a.

Congress an sawrkar a, kum sawm hmalam khan an lo sawrkar tawh a, khatih hunlai thil kha chiang taka hriat nei ve lem lo mah ila, Congress sawrkar lai kha chuan hotute khan zu leh nula an chen nasa an ti a, Eirukna pawh a tam ngang mai. Kum 10 chhung MNF an han sawrkar ve leh a, eng khu ruai an ni bik lo, Bible leh Necktie nen an eiru ve leh ta thung a, ram hmasawnna em em hmuh tur a awm ta chuang lo, project lian tak tak a awm a, bul pawh an tan ve ngei mahse eirukna avangin a hlawhtlinna hmuh tur a awm lo, Bible in "Sum tam tak aiin hmingthat hi thlan zawk tur a ni" tia a lo ziah te chuan an nunah awmzia a nei lo a. Project tha tak tak, ram mipui te tana tangkai leh an kumkhaw hmingthatna tur siamsaktu tur tihpuitlin ai chuan mahni tana sum chhekkhawl kha a pawimawh zawk a ni ange. Rual awh a na mang e.

Heti khawpa eirukna hluarna ramah hian 'eiru mahse hna thawk tho se,' tih te chu innghahna tlak ni lo mahse, beisei tur awmchhun a ni hrih a. Term kalta ah te chuan Congress leh MNF sawrkarna hnuaiah Mizoram in hma a sawn tawh lo tih chu tumah inhrilh hranpa ngai lovin kan hria.

Tunah Congress a han sawrkar leh a, Congress sawrkar chhan pawh hi mipui duh ngawih ngawih vang a nilovin, sawrkar lai thlak duhna vang leh, mipuiin tling lo se tih an nei si, tling tura duh an neih em em si loh kara vanneihna vang chauh niin ka hria. Hemi bakah hian Congress tlin chhan pakhat lian tak ni a ka hriat chu Media a ni a, tunlaiah Media in nasa takin hma a sawn tawh a, mi hi an ngawi mai mai tawh lo. Term hmasa a sawrkar lai MNF hnathawh dan leh an thil tih dan te chu mipuiin Media atangin kan hre zel a, a tha lam zawnga chhuah tur aiin a chhe lam zawnga chhuah tur a tam a, mipui kan lungawi lova, Congress in a hlawkpui thung niin ka hria. Tunah pawh hian mipuiin hmana an lo hnawl tawh kha chance an pe leh a, tuna an chance hi an bawhpelh a, thil diklo tak tak leh mahni inhaivur na mai atana an Lal-na hi an hmang leh a nih ngat chuan a thlang tlingtu mipui hian kum nga hnuah chuan kan paih leh mai dawn a, chumi hnuah phei chuan an dingchhuak leh thei kher tawh lo maithei asin. Tunah hian mipui leh Media mit chu Congress party ah a fu leh tan tawh dawn a, an fimkhur hle a ngai ang.

Eirukna chu sawi lova lum, thil lian tak tak te kal kanin Sawrkar thar tur ka chah duh tamtak zinga pakhat chu:
Hna lak kawngah hian FAIR rawh u. Mi thiam tak tak, aia thiam leh awm ngawih ngawihte an tlin hian an thikawm loh, an lawmpuiawm zawk thin; hna la zawng ve zel tur tan pawh a phurawm. Mahse, tling lo ngawih ngawih leh fair lo lutuk a an la tih hriat ve reng thin hian rilru a tina in, mi a ti beidawng thin. Chuvangin hna lak kawngah hian induhsakna hi dah bo vin a tling tak tak chauh la thin turin ka chah duh a ni. Chutilo chuan ram future tur thalaite rilru diklo leh tha lo input tir palh ange. Beiseina nei lova thailaite in siam a nih chuan, ram hmalam hun chu a thim tak a ni.