Singh is King

Politics hi ka tuipui lem lova, G.K atan chuan tlem tlem chu ka hre ve thin a. Tun tum UPA sawrkar buk erawh ngaihnawm ka tiin ka tuipui ve tlat. Ka ngaihdanah chuan Indo-US Nuclear deal hi tha ka ti a, chuvangin Left Party (CPI, CPI(M), RSD leh Forward Block) lamin sawrkar thlawpna an hnuhdawh a, sawrkar buk a nih pawh khan UPA hi an tling zo lovang tih ka hlau hle a, ka lo tang ve hle ringawt. Mi te angin a chhungril tak tak hre lem lo mah ila, hetia ka lo hriat ve phak tawkah chuan India in power, economy leh environment venhimna lamah te hma a sawnna tur a nih chuan Nuclear deal hi tha turah ka lo ngai hmiah mai. Mahse thil engkim hian thatna leh thatlohna a nei ang bawkin a thatlohna te pawh chu engemaw laiah chuan a lo awm ve mahna.


A thuhrimin Manmohan Singh hi ram hruaitu tha tak a ni a, economy lama India hmasawnna hi amah vang a tihloh theih loh, mithiam leh midik niin ka ring ve tawp, chubakah ram tana tha tur ni a a hriat chu PM nihna dinhmun derthawnawmah dinpui a hreh lova, tlinloh pui huam khawpa a beihna hi a ngaihsanawm zualna niin ka hria.

Eptu lamin 123 Agreement a US nena thuneihna intluktlang nei lo leh junior partner chauh ni a an sawi te, hetia US nena inkungkaihna leh thawhhona tha lehzual kan neih chuan terrorist entirnan: al-qaeda te target kan ni ve ang tih hlauhna te, Manmohan Singh hian India sawrkar leh US inlaichinna aia amah leh George Bush inlaichinna a ngaipawimawh zawka an puhna te leh IAEA in nuclear plant te an endik theihna an duhloh te chu chhan tamtak zinga thenkhat nimahse NDA lam pawh hian UPA dinhmunah ding ta se, an tihloh phal bik ka ring chiah lo.

Nimin a BJP MP 3 ten UPA lamin hai tura an thamna pawisa ni a an sawi pawisa an lek larh larh mai kha chuan Parliament a ti zahawm lo deuh in ka lo hre ve mai mai.

Mizoram MP Pu Zawma erawh a hai (abstain) thung, CM Pu Zoramthanga thu in. CM in he thuthlukna a siamna chhan ber chu kan rama an party khingpui lian ber Congress party kaihhruai a nih vangin leh UPA chu a tlak dawn loh hmel bawka a hriat vangin a hai tir a ni ber a, chu pawh chu nise ka ngaihdanah chuan Nuclear Deal hi kan ram tana tha an ti a nih chuan, party ep lam pawh nise vote ngei se, ram hmangaihtu zia zawk lo maw, Bangalore North MP Pu H.T Sangliana ang hian, ani pawh BJP MP ni mahse rama tana tha tura a hriatah chuan a party eptu lam pawh a thlawp mai